घाऊक व्यापाऱ्यांचा परवान्यांना विरोध

घाऊक व्यापाऱ्यांचा परवान्यांना विरोध


म. टा. वृत्तसेवा, नवी मुंबई

अन्न सुरक्षा कायद्याअंतर्गत, सर्वांना सुरक्षित सकस आणि निर्भेळ अन्न मिळणे गरजचे असल्याने अन्न, अन्न व्यवसाय, अन्न व्यवसाय चालक, त्यांची जागा आणि विक्री याही बाबी महत्त्वाच्या आहेत. याच अनुषंगाने अन्नसाखळी प्रक्रियेतील सर्व घटकांनी आणि अन्न व्यवसाय करणाऱ्यांनी अन्न परवाना किंवा नोंदणी प्रमाणपत्र घेणे अन्न औषध प्रशासनाने बंधनकारक केले आहे. या परवान्याशिवाय व्यवसाय सुरू करता येणार नसल्याचे स्पष्ट करण्यात आले आहे. त्यामुळे बाजार समितीमधील सर्वांनी हा परवाना घेणे आवश्यक असल्याचा आदेश बाजार समितीने दिला आहे. मात्र व्यापाऱ्यांनी या आदेशाला विरोध करत जाचक अटी घालून व्यापाऱ्यांना त्रास देण्याचा हा प्रयत्न असल्याचा आरोप केला आहे.

ज्या अन्न व्यावसायिकांची वार्षिक उलाढाल १२ लाखांपेक्षा जास्त आहे, त्यांनी परवाना घेणे आणि ज्या व्यावसायिकांची वार्षिक उलाढाल १२ लाखांपेक्षा कमी आहे, त्यांनी नोंदणी क्रमांक घेणे बंधनकारक आहे. हा आवश्यक परवाना न घेतल्यास या कायद्यात कठोर शिक्षेची तरतूद असून कलम ६३ नुसार, विनापरवाना व्यवसाय केल्यास सहा महिन्यांचा कारावास आणि पाच लाखांपर्यंत दंडाची तरतूद आहे. त्यामुळे ज्या व्यावसायिकांची परवान्याची मुदत संपली आहे, त्यांनी त्वरित परवाना नूतनीकरणासाठी अर्ज करावा, असे बाजार समितीने स्पष्ट केले आहे. मात्र समितीमधील व्यापाऱ्यांनी अन्न औषध परवाना आणि नोंदणीला विरोध केला आहे. मुंबई कृषी उत्पन्न बाजार समितीमध्ये सर्व प्रकारचा घाऊक व्यापार चालतो. शेतकऱ्यांकडून पिकवला जाणारा हा कृषी माल असून त्याची विक्री या ठिकाणी होते. येथे कोणत्याही प्रकारची प्रक्रिया या अन्नपदार्थांवर केली जात नाही. खुल्या पद्धतीने मालाची खरेदी-विक्री होते. येथून पुढे जाऊन या मालावर प्रक्रिया होते. मग येथे व्यापाऱ्यांना हे अन्न औषध प्रशासनाच्या परवान्याची सक्ती का केली जात आहे, असा सवाल व्यापाऱ्यांनी उपस्थित केला आहे. जिथे अन्न शिजवले जाते किंवा त्यावर प्रक्रिया केली जाते, त्यांच्यासाठी हे परवाना घेणे योग्य आहे, मात्र घाऊक बाजारात या परवान्याची आणि नोंदणी क्रमांकाची अट कशासाठी, असा प्रश्न यामुळे व्यापाऱ्यांनी उपस्थित केला आहे.

मी माझ्या गाळ्यामध्ये कांदा-बटाट्याचा व्यापार करतो. शेतातून येणारे कांदे-बटाटे जसे येतात तसेच, त्यावर कोणतीही प्रक्रिया न करता त्याची विक्री करतो. मग यासाठी मला हा परवाना घेण्याची गरज काय आहे? मी त्यावर कोणतीच प्रक्रिया करत नाही. त्यामुळे त्यात कोणत्याही प्रकारची भेसळ होण्याचा प्रश्न येत नाही. मग मी हा परवाना का घ्यायचा?

– मनोहर तोतलानी, व्यापारी

व्यवसाय करण्यासाठीही परवान्याची घातलेली अट म्हणजे भ्रष्टाचाराला दिलेले आमंत्रण आहे. यामुळे कागदी घोडे जास्त प्रमाणात नाचवावे लागणार आहेत. अनेकदा लोक घरगुती कार्यक्रमासाठीही बाजारात येऊन खरेदी करतात. अनेक गृहिणी गृहोद्योग लहान स्वरूपात करतात. त्यासाठी बाजारातून मालाची खरेदी करतात. त्यांच्यासाठीदेखील ही डोकेदुखी ठरणार आहे. व्यापाऱ्यांचेही काम यामुळे वाढणार आहे.

– कीर्ती राणा, माजी संचालक, बाजार समिती

अन्न औषध परवाना विभागातून जशा सूचना बाजार समितीला आल्या आहेत, त्यानुसार व्यापाऱ्यांना त्या कळवण्यात आल्या आहेत. त्यामुळे त्यांनी त्यानुसार परवाने घ्यावेत किंवा नोंदणी क्रमांक घ्यावा.

– अशोक डक, सभापती, बाजार समिती



Source link

Leave a Reply

Your email address will not be published. Required fields are marked *

en_USEnglish
%d bloggers like this: