मंत्री अनिल परब यांची ईडीकडून १३ तास मॅरेथॉन चौकशी, कारवाईनंतर पहिली प्रतिक्रिया

मंत्री अनिल परब यांची ईडीकडून १३ तास मॅरेथॉन चौकशी, कारवाईनंतर पहिली प्रतिक्रिया

[ad_1]

मुंबई : महाराष्ट्राचे परिवहन मंत्री अनिल परब यांच्या घरावर ईडीने आज छापेमारी केली. ईडीच्या अधिकाऱ्यांनी त्यांची १३ तास मॅरेथॉन चौकशी केली. “दापोली येथील साई रिसॉर्ट चालू नसताना केंद्रीय पर्यावरण विभागाकडून खोटा गुन्हा दाखल केला गेला. आजची चौकशी फक्त रिसॉर्टविषयी होती. परंतु सूडबुद्धीने ही कारवाई सुरु होती”, अशी प्रतिक्रिया अनिल परब यांनी दिली.

१३ तासांच्या मॅरेथॉन चौकशीनंतर अनिल परब यांनी माध्यमांशी संवाद साधला. अधिकाऱ्यांनी कोणकोणते प्रश्न विचारले, कोणत्या विषयांवर चौकशी झाली, याबद्दलची माहिती त्यांनी प्रसारमाध्यमांना दिली. ‘दापोली येथील साई रिसॉर्टसंबंधी आज माझी चौकशी केली गेली’, असं अनिल परब यांनी सांगितलं.

परब म्हणाले, “आज ईडीच्या अधिकाऱ्यांनी माझ्या निवासस्थानावर तसेच माझ्याशी संबंधित काही लोकांवर छापे मारले. गेल्या काही दिवसांपासून या बातम्या सतत येत होत्या. ईडीची कारवाई होणार, अशा बातम्या सातत्याने कानावर पडत होत्या. यामागील गुन्हा तपासला असता असं लक्षात आलं, दापोली येथील साई रिसॉर्ट, जे मी पहिल्या दिवसापासून सांगतोय, याचे मालक सदानंद कदम आहेत. याचा मालकी हक्क त्यांनी सांगितला आहे. कोर्टातही तसा दावा केला आहे. त्यांनी खर्चाचे सर्व हिशोब आयकर विभागाला दिले, हे सगळं असताना हे रिसॉर्ट अजून पूर्ण झालेलं नाही. असं असताना पर्यावरणाची दोन कलमं लावून या रिसॉर्टमधून सांडपाणी समुद्रात जातं अशा प्रकारचा चुकीचा गुन्हा केंद्रीय पर्यावरण खात्याने दापोली पोलिसांत दाखल केला आहे”

“जे रिसॉर्ट सुरूच नाहीये ज्याच्याबद्दल प्रदुषण महामंडळाने रिपोर्ट दिलाय, पोलिसांनी रिपोर्ट दिलाय की हा रिसॉर्ट सुरू नाही. तरी देखील माझ्या नावाने, साई रिसॉर्टच्या नावाने नोटीस काढली गेली, तक्रार दाखल केली गेली. त्याला प्रेडिगेटेड ऑफेन्स समजून ईडीने माझ्यावर छापेमारीची कारवाई केली. त्यांनी विचारलेल्या सर्व प्रश्नांची उत्तर मी दिलेली आहे. यंत्रणांच्या कुठल्याही प्रश्नांना मी उत्तर द्यायला तयार आहे”, असा पुनरुच्चार त्यांनी केला.

“यापुढेही त्यांनी मला प्रश्न विचारले तर त्याला उत्तर देण्याची तयारी आहे. बंद रिसॉर्टचं सांडपाणी समुद्रात कसं जाईल. या सर्व गोष्टींचा खुलासा कोर्टात होईल, चौकशीअंती सगळं सत्य समोर येईल. मी चौकशीला पुढे गेलो आहे आणि यापुढेही मी चौकशीला जाईल. मी प्रत्येक गोष्ट कायद्याला पुढे ठेवून बघतो, त्यामुळे मला माहितीये कायद्यानुसार काय होऊ शकतं, काय होऊ शकत नाही, त्यामागील काय अर्थ काढायचे ते वेळ आल्यावर पाहू”, असंही परब म्हणाले.

[ad_2]

Source link

Leave a Reply

Your email address will not be published. Required fields are marked *