ऐरोलीच्या भुयारी मार्गाला चालना;नवी मुंबई महापालिकेकडून रेल्वेला नवीन नकाशे सादर


म. टा. वृत्तसेवा, नवी मुंबई

ठाणे-बेलापूर रस्ता व ऐरोली नाका परिसराला जोडणाऱ्या भुयारी मार्गाचे काम लवकरच मार्गी लागण्याची चिन्हे आहेत. या संदर्भात पालिका व रेल्वेच्या आधिकाऱ्यांसमेवत नुकत्याच पार पडलेल्या बैठकीत रेल्वेने भुयारी मार्गासंदर्भात सकारात्मक भूमिका घेतली आहे. पालिकेने भुयारी मार्गाचे असणारे नवीन नकाशे रेल्वेकडे सादर केले असून नकाशांना मंजुरी मिळाल्यानंतर हे काम मार्गी लागणार आहे. रेल्वेच्या मंजुरीनंतर नव्याने प्रस्ताव सादर केला जाईल. त्यानंतर आयुक्तांनी प्रशासकीय खर्चाला मंजुरी दिल्यानंतर निविदा काढली जाणार आहे.

ऐरोली नाका येथील भुयारी मार्गाचे काम हे मागील नऊ वर्षांपासून तांत्रिक अडचणींमुळे रखडले होते. या भुयारी मार्गाची नवी मुंबई महापालिकेने पाचवेळा निविदा काढली होती. मात्र कंत्राटदार मिळत नव्हता. अखेर या भुयारी मार्गाच्या कामासाठी पालिकेने रेल्वेकडे नवीन आराखडा तयार करून प्रस्ताव पाठविला आहे.

ठाणे-बेलापूर मार्गावरील चिंचपाडा आणि ऐरोली नाका परिसरातील नागरिकांना जीव मुठीत धरून रेल्वे मार्ग ओलांडावा लागतो. अनेकदा रेल्वे मार्ग ओलांडताना अपघातही झाले आहेत. ऐरोली नाका, ऐरोली गाव, शिव कॉलनी, महावितरण वसाहतीमधील नागरिकांना ठाणे-बेलापूर मार्गावर जाण्यासाठी ऐरोली सेक्टर तीन येथील भुयारी मार्गातून द्राविडी प्राणायाम करत जावे लागते. वाहनचालकांसह नागरिकांचा प्रवास सुलभ व्हावा, यासाठी नगरसेवक अनंत सुतार यांनी भुयारी मार्ग उभारण्यासाठी पाठपुरावा केला होता. महानगरपालिकेने पाचवेळा निविदा काढली होती. मात्र हे काम अत्यंत किचकट असून रेल्वे प्रशासनाच्या उदासीनतेमुळे आणि असहकार्यामुळे रखडले होते. रेल्वेकडे पालिकेने २३ सप्टेंबर २०१३ रोजी अनामत रक्कम म्हणून ३७ लाख ३२ हजार ५०० रुपयेही भरले आहेत. भुयारी मार्गासाठी अशी अडचण उभी ठाकली असताना येथून उड्डाणपुलासाठी परवानगी मागण्यात आली होती. मात्र येथून उच्च दाबाची विद्युत वाहिनी गेली असल्यामुळे उड्डाणपूल बांधता येणार नसल्याचे रेल्वेने स्पष्ट केले होते. त्यानंतर पालिकेकडून भुयारी मार्गासाठी नव्याने प्रस्ताव रेल्वेकडे पाठवण्यात आला आहे.

ऐरोली नाक्यावरील भुयारी मार्गासाठी रेल्वेकडे नव्याने नकाशे सादर करण्यात आले आहेत. रेल्वेची मंजुरी आल्यानंतर काम मार्गी लागणार आहे.

– संजय देसाई, शहर अभियंता, नवी मुंबई महानगरपालिका

वाहतूककोंडी फुटणार

ऐरोली नाका येथील वखारीपासून ठाणे-बेलापूर मार्गावरील चिंचचाडा येथे रेल्वे रुळांखालून हा भुयारी मार्ग बांधण्यात येणार आहे. हा मार्ग सुमारे २०० मीटरचा असेल. या भुयारी मार्गातून पादचाऱ्यांसह वाहनेही जाऊ शकणार आहेत. ऐरोली नाका येथे भुयारी मार्ग झाल्यास ठाणे-बेलापूर रस्त्यावरून ऐरोली नाका येथे जाणे सोपे होणार आहे. भारत बिजली व ऐरोली रेल्वे स्थानक येथील भुयारी मार्गावरचा ताण कमी होणार असून भारत बिजली येथील वाहतूककोंडी फुटणार आहे.

४१ कोटींचा खर्च

ऐरोली नाका येथील भुयारी मार्गाचा प्रस्ताव हा २०१३मध्ये बनवण्यात आला होता. त्यावेळी भुयारी मार्गाचा खर्च हा ३४ कोटी रुपयांपर्यंत होता. मात्र आता त्यामध्ये वाढ होणार असून यासाठी ४१ कोटी रुपये खर्च होणार आहेत. रेल्वेलाही अनामत रक्कम म्हणून ३७ लाख ३२ हजार ५०० रुपये भरले होते. त्यामध्येही वाढ होणार आहे.



Source link

Leave a Reply

Your email address will not be published.

en_USEnglish