मला साहेबांच्या अंत्यसंस्काराला जाऊ द्या, दर्शन घेऊ द्या, मेटेंच्या ड्रायव्हरने टाहो फोडला


मुंबई : “मला इथे का ठेवलंय, मला काही होत नाही…. मला साहेबांचं अखेरचं दर्शन घेऊ द्या… मला त्यांच्या अंत्यसंस्काराला जाऊ द्या”, असा टाहो विनायक मेटे यांच्या गाडीचे चालक एकनाथ कदम यांनी फोडला. पनवेलच्या एमजीएम रुग्णालयात उपचार घेत असलेल्या असलेल्या एकनाथ कदम यांच्या चौकशीसाठी पोलिसही दाखल झाले आहेत. यावेळी पोलिसांकडेच त्यांनी अंत्यसंस्काराला जाऊ द्या, अशी आर्त विनवणी केली. यावेळी विनायक मेटे यांच्या जाण्याचा किती मोठा धक्का बसलाय, हे कदम यांच्या देहबोलीवरुनच कळत होतं. पोलिसांना विनवणी करताना ते लहान बाळासारखं धाय मोकलून रडत होते. आपलं शरीर सांभाळणही त्यांना कठीण झालं होतं. अशा स्थितीत पोलीस त्यांना आवरत होते.

मराठा आरक्षणासाठी शेवटच्या श्वासापर्यंत लढणारा नेता, जगाला हेवा वाटावा असं शिवस्मारक व्हावं यासाठी आटोकाट प्रयत्न करणारा आवाज माजी आमदार विनायक मेटे यांचं रविवारी सकाळी अपघाती निधन झालं. मुख्यमंत्री एकनाथ शिंदे यांनी मराठा क्रांती मोर्चाची बैठक बोलावली होती, त्याच बैठकीला हजेरी लावण्याकरिता मेटे बीडहून मुंबईकडे येत होते. बीडमध्ये स्वातंत्र्यदिनाच्या पूर्वसंध्येला मोठा कार्यक्रम असतानाही समाजाच्या प्रश्नाला न्याय मिळवून देण्यासाठी आपली उपस्थिती महत्त्वाची आहे, हे प्रमाण मानून त्यांनी बीडमधला कार्यक्रम सोडला आणि मुंबईच्या दिशेने रवाना झाले. पण वाटेत त्यांना काळाने गाठलं. मुंबई पुणे द्रुतगती महामार्गावर रसायणीजवळ त्यांचा अपघात झाला. त्यांचे वाहनचालक एकनाथ कदम आणि बॉडीगार्ड राम ढोबळे जखमी झाले आहेत. वाहन चालक एकनाथ कदम यांच्यावर पनवेलमधील एमजीएम रुग्णालयात तर राम ढोबळे यांच्यावर पुण्यातील रुबी हॉल क्लिनिक इथे उपचार सुरु आहेत.

एकनाथ कदम यांनी विनायक मेटे यांच्या वाहनाचं गेली अनेक वर्ष सारथ्य केलं. मेटेंचा कदम यांच्यावर फार जीव होता. दौऱ्यावर असतानाही स्वत:च्या जेवणाआधी ते कदम यांच्या जेवणाची विचारपूस करायचे. असंख्य दौऱ्यात मेटेंना कदम यांनी साथ दिली. कालही मुख्यमंत्र्यांनी बोलाविलेल्या बैठकीला बीडमधील कार्यक्रम आटपून मेटेंसोबत यायला कदम मध्यरात्री निघाले. पहाटे पाच पर्यंत त्यांनी लोणावळा क्रॉस केला. पण रसायणीजवळ समोरच्या ट्रकने लेन बदलल्याने मेटे यांच्या गाडीने ट्रकला धडक दिली. हा अपघात एवढा भीषण होता की मेटेंच्या इन्डेव्हेर गाडीच्या समोरच्या भागाचा पूर्ण चक्काचूर झाला. या अपघातात चालक एकनाथ कदम आणि बॉडीगार्ड ढोबळे जखमी झाले तर मेटे यांच्या डोक्याला गंभीर मार लागून पुढच्या काही तासांत त्यांची प्राणज्योत मालवली.

दुसरीकडे एकनाथ कदम यांना डिस्चार्ज मिळण्याची पोलीस वाट पाहत आहे. कदम आणि धडक दिलेल्या ट्रक ड्रायव्हरची पोलीस एकत्रित चौकशी करणार आहे. पोलीस अधिकारी रुग्णालयात कदम यांना ताब्यात घेण्यासाठी पोहोचले आहेत.

रणझुंजार मेटे…!

विनायक मेटे यांची ओळख आंदोलनकारी नेते अशी होती. मराठा समाजाच्या प्रश्नांना वाचा फोडण्यासाठी ते सतत आंदोलनाच्या माध्यमातून सत्ताधाऱ्यांना प्रश्न विचारायचे. फक्त रस्त्यावरच्या लढाईतच ते अग्रेसर नसत तर समाजातील आमदारांचा आवाज ‘शांत’ असताना विधिमंडळात देखील मराठा समाजाच्या प्रश्नांसाठी ते सत्ताधाऱ्यांना भांडत. समाजाला न्याय मिळाला पाहिजे, अशी अंतिमत: त्यांची भूमिका होती. आघाडी आणि युतीसोबतही काम केलं असल्याने सर्वपक्षीयांबरोबर त्यांचे उत्तम संबंध होते. वरिष्ठ नेत्यांच्या नसा त्यांना ठाऊक होत्या. कोणत्या वेळी काय भूमिका घ्यायची, ज्यातून समाजाचे प्रश्न मिटतील, हे त्यांना बरोबर कळायचं. यादरम्यान ते सत्ताधाऱ्यांना जाऊन मिळतात, सत्ताधाऱ्यांशी सलगी करतात, असे आरोपही झाले. पण प्रश्न मिटविण्यासाठी सत्ताधाऱ्यांशी जुळवून घ्यावच लागतं, असं सांगत ते मार्गक्रमण करत राहिले.

जनमाणसाचा आवाज असलेले, महाराष्ट्रावर छाप पाडून दिल्लीला काबीज करु पाहणारे, प्रमोद महाजन-विलासराव देशमुख-गोपीनाथ मुंडे- राजीव सातव हे नेते हसता खेळता गेले. या सगळ्या नेत्यांची मराठवाड्यावर छाप होती. फक्त आपापल्या जिल्ह्यापुरते सीमित न राहता या नेत्यांचं राज्य आणि देशपातळीवर काम होतं. त्यांच्या कामाने त्यांना देशभर ओळख मिळाली. या नेत्यांनंतर मेटे यांच्यावर मोठी जबाबदारी होती. मराठवाड्याचा आवाज क्षीण होत असताना, मराठा समाजाच्या प्रश्नांच्या माध्यमातून तो आवाज बुलंद करण्याची जबाबदारी मेटे यांच्यावर होती. आतापर्यंत त्यांच्या कामाने मेटे राज्यभर पोहोचले होतेच. पण आता संभाजीराजेंच्या खांद्याला खांदा लावून नेतृत्व करायची वेळ आली, तेव्हा मेटेंना काळाने असं हिरावून नेलं.



Source link

Leave a Reply

Your email address will not be published.

en_USEnglish