कोकणातून मोठी बातमी; ‘या’ दोन नगरपंचायतींच्या निवडणुकीची तयारी सुरू


हायलाइट्स:

  • दापोली आणि मंडणगड नगरपंचायतींच्या निवडणुकांच्या तारखा जाहीर
  • राजकीय पक्ष आणि इच्छुक उमेदवारांनी केली तयारी सुरू
  • रत्नागिरी जिल्ह्यातील लक्षवेधी निवडणुकांकडे सर्वांचे लक्ष
  • राष्ट्रवादीकडून या दोन्ही ठिकाणी स्वबळावर लढण्याची तयारी

प्रसाद रानडे, दापोली: रत्नागिरी जिल्ह्यात दापोलीमंडणगड नगरपंचायतीच्या निवडणुकांचे बिगूल वाजले आहे. राजकीय पक्ष व इच्छुकांची तयारी सुरू झाली आहे. राज्य निवडणूक आयोगाने कार्यक्रम जाहीर केला आहे. या निवडणुकीची २४ नोव्हेंबर रोजी आचारसंहिता लागू झाली आहे. २१ डिसेंबर रोजी प्रत्यक्ष मतदान होणार आहे. मतदार याद्या प्रसिद्ध करणे आदी निवडणुकीची जय्यत तयारी प्रशासनाकडून सुरू आहे.

प्रभागरचना व आरक्षण जाहीर झाल्याने इच्छुकांनी मतदार याद्या नेऊन उमेदवारी अर्ज दाखल करण्यासाठी तयारी सुरू केली आहे. १ डिसेंबरपासून उमेदवारी अर्ज दाखल करता येणार आहेत. दापोली नगरपंचायतीवर सद्यस्थितीत शिवसेना-काँग्रेस सत्तेत आहेत; तर मंडणगड नगरपंचायतीमध्ये राष्ट्रवादीची सत्ता आहे. राजकीय पक्षांकडूनही उमेदवार निश्चित करण्यासाठी बैठका, चर्चा सुरू आहेत. रत्नागिरी जिल्ह्यात लक्षवेधी असलेल्या दापोली मतदारसंघातील या नगरपंचायत निवडणुकांकडे अवघ्या जिल्ह्याचे लक्ष लागून राहिले आहे.

मुंबईचे माजी पोलीस आयुक्त परमबीर सिंह यांना मोठा दिलासा, पण…

मच्छिमार कायदा भ्रष्टाचार वाढवणारा

दापोली नगरपंचायतमध्ये सध्या शिवसेना ७, राष्ट्रवादी ४, कॉंग्रेस ४ व २ भाजप असे पक्षीय बलाबल आहे. तर मंडणगड येथे १६ राष्ट्रवादी, तर एक शिवसेना असे पक्षीय बलाबल सद्यस्थितीत आहे. दापोली नगरपंचायतीच्या २०१६ मध्ये झालेल्या निवडणुकीसाठी शिवसेना व भाजप यांनी ही निवडणूक स्वबळावर तर, राष्ट्रवादी व कॉंग्रेस यांनी आघाडी करून ही निवडणूक लढवली होती. तेव्हा शिवसेना व भाजप यांची युती असल्याने शिवसेनेचे ७ व भाजपचे २ सदस्य मिळून नगरपंचायतीत सत्ता स्थापनेचा दावा करण्यासाठी शिवसेनेकडून भाजपकडे विचारणा करण्यात आली होती; मात्र भाजपने त्याला नकार दिला होता. दरम्यान २०१६ साली निवडणूक निकाल जाहीर झाले, त्याच दिवशी भाजपचा नगराध्यक्ष तर काँग्रेसला उपनगराध्यक्ष देऊ असे तत्कालीन आमदार संजय कदम यांनी आधीच जाहीर केले. शिवसेनेला सत्तेपासून लांब ठेवण्यासाठी त्यांनी ही केलेली घोषणा काँग्रेसला मान्य नव्हती. काँग्रेस व भाजपा हे दोन्ही राष्ट्रीय परस्पर विरोधी विचारांचे पक्ष आहेत. त्यामुळे आम्हाला कोणी गृहीत धरू नये, अशी स्पष्ट भूमिका काँग्रेस नेते भाई जगताप यांनी मांडली. दरम्यान या सगळ्या घडामोडीत दुखावलेल्या काँग्रेसने थेट शिवसेनेशी हातमिळवणी करून तत्कालीन पर्यावरण मंत्री रामदास कदम व काँग्रेस नेते भाई जगताप यांनी दापोली नगरपंचायतीत लक्ष घातले व नवी राजकीय खेळी करत राष्ट्रवादी व भाजपला सत्तेबाहेर ठेवले. शिवसेनेचा नगराध्यक्ष व काँग्रेसचा उपनगराध्यक्ष विराजमान झाले. शिवसेना काँग्रेस आघाडीचा प्रयोग दापोलीत यशस्वीपणे ५ वर्षे सत्तेत कार्यरत राहिला. हा तात्कालीक स्वरूपाचा प्रासंगिक करार केल्याचे काँगेस नेते भाई जगताप यांनी जाहीर केले. या सगळ्या पार्श्वभूमीवर आता पुढील डिसेंबर महिन्यात होऊ घातलेल्या सार्वत्रिक निवडणूक २०२१ मध्ये सगळेच राजकीय पक्ष कोणती भूमिका घेतात, याकडे अनेकांचे लक्ष लागून राहिले आहे. दरम्यान राष्ट्रवादीकडून या दोन्ही ठिकाणी स्वबळावर लढण्याची जाहीर भूमिका घेण्यात आली आहे.

नाशिकमध्ये घबराट! एका रात्रीत पाच मेडिकल दुकाने फोडली; चोरीचा व्हिडिओ व्हायरल



Source link

Leave a Reply

Your email address will not be published.

en_USEnglish